Magumadas

Proietzione de su film "L'arbitro"

S'Assòtziu Culturale "S'olmina 'e s'alte", cun sa collaboratzione de su Comune de Magumadas, invitant a partetzipare a sa proietzione de su film "L'arbitro" chi s'at a fàghere chenàbura 18 de cabudanni a sas 9 de sero (h 21,00) in localidade "Binza 'e crescia". 

 

 

Iscritziones de sos pitzinnos a su servìtziu de trasportu a sas iscolas

Su Comune de Magumadas faghet a ischire a chie est interessadu chi pro  iscrìere sos pitzinnos a su servìtziu de trasportu a sas iscolas pro s'annu iscolàsticu 2015/2016, tocat de presentare sa domanda in Comune, in su mòdulu apòsitu, o in s'ufìtziu de sos servìtzios sotziales o in s'ufìtziu protocollo intro de su 10/09/2015. 

 

 

Cursu de inglesu

Su Comune de Magumadas faghet a ischire chi cheret organizare unu (o prus de unu) cursu de inglesu pro mannos e minores residentes in Magumadas chi at a durare 30 oras. Sas dies e sos oràrios sunt de istabilire. Sa cuota est de 20 èuros pro sos istudiantes e de 40 èuros pro sos mannos. Chie est interessadu si devet iscrìere in s'Ufìtziu Protocollo intro de su 12/12/2014. 

 

 

Gita sòtziu-culturale a Tìana

S'Amministratzione comunale de Magumadas faghet a ischire chi est organizende una gita sòtziu-culturale a Tìana in ocasione de sa manifestatzione "Autunno in Barbàgia" de fàghere su 16 de santandria 2014. Sunt invitados a partetzipare residentes e non residentes de cale si siat edade. Sos residentes pagant chimbe èuros e sos chi no sunt residentes deghe èuros. Sas cuotas de adesione si devent versare in comune cando si presentat sa domanda de partetzipatzione. Chie cheret mandigare in ristorante devet pagare a su momentu; sos pitzinnos suta sos deghe annos no pagant nudda. Sas domandas cherent presentadas intro de su 10/11/2014 a s'Ufìtziu Servìtzios Sotziales. No s'ant a atzetare sas domandas chi ant a imbàtere a pustis de sa data de iscadèntzia.
Iscàrriga s'avisu 
Su mòdulu de adesione si podet iscarrigare dae su situ http://www.comune.magomadas.or.it/.

 

 

Pròroga progetos pro "Funtana 'e Renu"

Su Comune de Magumadas faghet a ischire chi at prorogadu sos tèrmines pro presentare sos progetos pro "Funtana 'e renu". S'iscadèntzia est fissada a su 31/10/2014. Sas propostas cherent cunsignadas a s'Ufìtziu protocollo in una busta indiritzada a su Comune chi devet cuntènnere àteras duas bustas sigilladas e anònimas. In sa prima busta bi devent èssere sos datos anagràficos e a fora bi devet èssere iscritu "Contiene dati anagrafici"; in sa segunda busta su progetu (anònimu) e a fora bi devet èssere iscritu chi cuntenet su progetu. Pro cale si siat informatzione preguntare in Comune. 

 

 

Gita a sa Barbàgia

S'Amministratzione comunale de Magumadas faghet a ischire chi cheret organizare una gita sòtziu-culturale, in ocasione de sa manifestatzione "Autunno in Barbagia 2014", in unu (o prus de unu) de sos logos chi sighint: Mamoiada (su 9 de santandria); Tiana (su 16 de santandria); Teti (su 30 de santandria); Gadoni (su 7 de nadale); Fonni (s'8 de nadale). Su logu s'at a detzìdere a tenore de su chi at seberadu sa populatzione. Sas domandas de adesione cherent presentadas a s'ufìtziu de sos Servìtzios Sotziales o a s'ufìtziu Protocollo intro de su 10/10/2014. 

 

 

Ocannu a in ue andamus a villegiare?

Su Comune de Magumadas faghet a ischire chi est organizende una villegiadura de fàghere in su mese de cabudanni.
Est aberta a totus e tocat a seberare si si cheret andare a su Lagu de Garda, a Montecatini Terme o a Praga (cheret iscritu in su mòdulu chi s'agatat in sos ufìtzios comunales).
Sa cuota est de € 200,00 pro sos residentes e carchi cosa in prus pro sos chi non sunt residentes. Sas domandas de partetzipatzione cherent presentadas a sos ufìtzios de su Comune intro de su 22 de austu 2014.

 

Cuntzertu "multisensoriale" ENERGHEIA

Su Comune de Magumadas, paris cun s'Assòtziu Culturale "Sofia", invitant a partetzipare a su cuntzertu "multisensoriale" ENERGHEIA chi at a bìdere sa partetzipatzione de Gabriella Perugini (liuto e tiorba) e de Federica Dallolio (campanas tibetanas). S'at a fàghere cras 29 de triulas 2014 a sas sete de sero (h 19,00) in su Museo de su Binu de Magumadas. S'ant a pòdere ammirare fintzas sos traballos fatos in su cursu "Cucire e reinventare riciclando" ghiadu dae Antonella Murtas. 

 

 

Realizatzione àteros murales

S'Amministratzione Comunale de Magumadas faghet a ischire a chie podet èssere interessadu chi sunt abertas sas iscritziones pro sa realizatzione de àteros 10 murales in carrera Gabriele D'Annunzio. Sas domandas cherent presentadas a s'Ufìtziu Protocollo intro de sas duas (h 14,00) de su 31 de trìulas 2014.
Ant a èssere ammìtidas a partetzipare sas primas deghe domandas chi ant a imbàtere a su Comune. Sos traballos devent cumintzare intro de su mese de austu e finire intro de su mese de cabudanni 2014. Si podent impreare tècnicas mistas de pitura e sos temas sunt su territòriu de Magumadas e de sa Pianalza (cultura, panorama, istòria, traditziones, agricultura). A sos artistas s'at a dare unu cumpensu de treghentos èuros.
Pro informatziones si podet preguntare in Comune o abbaidare su situ istitutzionale

 

Ordinàntzia contra a sos fogos

Si faghet a ischire chi su Comune de Magumadas at fatu s'ordinàntzia contra a sos fogos. Duncas chie tenet ortos e logos in campagna los devet innetiare cantu prus prestu. Chie no lu faghet at a èssere punidu a norma de lege.

 

 

Binchidores de su cuncursu "Coloriamo Magomadas"

S'Amministratzione Comunale de Magumadas torrat gràtzias a totu sos chi ant partetzipadu a sa prima editzione de su cuncursu "Coloriamo Magomadas", in manera particulare a sos artistas chi ant valorizadu sa bidda cun sas òperas issoro e a sos istudentes e mastros de sas iscolas de Tresnuraghes e Magumadas. 
Sos binchidores sunt: 1) M.Antonella Murtas (Iscanu); 2) Lia Obinu (Magumadas); 3) Barbara Adrianopoli (Frussio).
Totu sos artistas ant retzidu s'atestadu de partetzipatzione.
Sas fotografias de totu sos murales sunt publicadas in sa pàgina printzipale de su situ de su Comune, paris cun sas àteras fotografias de sa bidda. Cullega·ti dae inoghe.
 

 

Bandu de mobilidade

Su Comune de Magumadas faghet a ischire chi b'at unu bandu de mobilidade esterna pro unu postu de istrutore tècnicu-amministrativu cat. C a tempus prenu e indeterminadu. Chie est interessadu devet presentare sa domanda a su Comune de Magumadas intro de sa una (h 13,00) de su 29/05/2014.

 

 

Sa Die de sa Sardigna 2014

Su grupu Traditziones Populares "S. Elia" e su Coro Polifònicu "Stella Maris" paris cun s'Amministratzione Comunale de Magumadas invitant a partetzipare a sa cummemoratzione de sa Die de sa Sardigna chi s'at a fàghere oe 28 de abrile 2014 a sas ses e mesa de sero (h 18, 30) in sas  iscolas elementares betzas de Magumadas. A pustis de s'intrada solenne de su gonfalone, iscortadu dae sos barratzellos, b'at a èssere su saludu de su sìndigu e de sas autoridades comunales. Sa sìntesi istòrica l'at a fàghere s'istudiosu de istòria e traditziones populares de sa Sardigna Luciano Sechi. At a cantare su coro polifònicu e ant lègere sos pitzinnos de iscola. 

 

 

1° editzione cuncursu de pitura - realizatzione murales "Coloriamo Magomadas"

S'Amministratzione Comunale de Magumadas faghet a ischire chi sunt abertas sas iscritziones a sa 1^ editzione de su cuncursu de pitura - realizatzione de murales - "Coloriamo Magomadas". Sa mustra s'at a fàghere domìniga 17 de maju 2014. Sas iscritziones iscadint chenàbura 2 de maju 2014. Sos primos tres classificados ant a bìnchere prèmios in dinari. Pro cale si siat informatzione preguntare in sos ufìtzios comunales de Magumadas. 

 

Ispetàculu de "Sas Comares" de Bosa

Sàbadu 21 de nadale s'Assòtziu teatrale "Sas Comares" de Bosa at a èssere in Magumadas cun s'ispetàculu "Su prèsperu de Nadale".
Sa cummèdia s'at a fàghere a sas 5 e mesa de sero (h 17,30) in sa palestra comunale.
Seis totus invitados a partetzipare.

 

 

Radunu mezos militares istòricos

S'Amministratzione comunale de Magumadas, paris cun sa Pro Loco e s'Assòtziu culturale "Gruppo Tradizioni Popolari Sant'Elia di Magomadas", in ocasione de su II Radunu de sos mezos militares istòricos (chi s'at a fàghere in Magumadas su 27/09/2013), organizat "Una die paris". 
Programma:
h 10,30 - Arrivu de sos mezos istòricos
h 11,00 - Vìsita a su museu de su binu e degustatzione de sa malvasia
h 12,00 - Vìsita a su territòriu e pasada in sa pratza de Santa Maria de mare
h 13,00 - Si màndigat in sa palestra comunale in carrera Trieste
h 15,00 - Mustra de sos mezos in su parcu comunale "Binza de crèsia"
h 17,00 - Partèntzia de sos mezos istòricos
h 19,00 - Mustra de sos produtos locales in su tzentru istòricu
h 21,30 - Mùsica in pratza Santu Giuanne

 

 

Magumadas e sos Moros

A s'istòria antiga de Magumadas no li mancant tribulias e eroismos.
Sa bidda de Magumadas in antigu fiat fraigada afaca a sa marina, in su montrigu de Santu Nigola. In su 1226 sos Moros, calados de improvisu, l'aiant passada a fogu e sos magumadesos iscampados aiant isbandonadu sa bidda derruta, torrende·la a fraigare in logu prus seguru.
Ma cun sos Moros logu seguru non bi nd'aiat (comente mustrant sas turres chi s'agatant in ogni punta de Sardigna), e a Magumadas cussa sorte l'est tocada paritzas bortas.
In su 1864 sos Moros, calados a de note, ant isrobadu sas domos e fatu presoneri unu fiotu de magumadesos.
Ma in cussa ocasione s'òmine chi inditaiat su caminu a sos cossàrios (unu magumadesu fatu presoneri in un'incursione passada) fiat resurtadu a si fuire e aiat curtu a Tresnuraghes a dare s'allarme. Sa gente, ischidada dae sas campanas, no at tìmidu a pònnere fatu a sos Moros segudende·los e isperdende·nche·los in sa localidade chi oe si narat "Sa Barca Isfata" (est a nàrrere 'la barca distrutta'). A sos tresnuraghesos los guidaiat su capitanu de sos Barratzellos Giuanne Maria Pòddighe, unu giòvanu ardimentosu chi est resurtadu a nd'istratzare s'istendardu a sos Moros.
Oe cussu istendardu, regaladu dae Pòddighe a sa fìgia chi s'est cojuada cun unu magumadesu, s'agatat in sa crèsia de Magumadas.
Teniat resone Edrisi (geògrafu àrabu de su sèculu XII) cando naraiat chi "sos Sardos sunt unu pòpulu valorosu, chi non lassat mai sas armas".
FONTE:   Magomadas. Cenni geografici, storici e linguistici in Il lessico della viticoltura tradizionale. Inchiesta linguistica a Magomadas (tesi de làurea de Anna Maria Angioi).

 

 

Cursu de vela

S'Amministratzione Comunale de Magumadas at aderidu a sa proposta de su cìrculu nàuticu de Bosa de organizare unu cursu de vela pro sos magumadesos. S'ant a fàghere 8 letziones in sas dies chi sighint:
- Sàbadu 6 de trìulas, a mangianu, in s'iscola elementare betza de Magumadas;
- Sàbadu 13 de trìulas, a mangianu, in sa sede de su cìrculu nàuticu de Bosa Marina;
- Sàbadu 20 de trìulas, a mangianu e a sero, in sa sede de su cìrculu nàuticu de Bosa Marina;
- Sàbadu 27 de trìulas, a mangianu e a sero, in sa sede de su cìrculu nàuticu de Bosa Marina;
- Sàbadu 03 de austu, a mangianu e a sero, in sa sede de su cìrculu nàuticu de Bosa Marina.
Sas ispesas de su cursu sunt a càrrigu de sos partetzipantes. Pro nd'ischire de prus, tocat de preguntare in su Comune de Magumadas. Sas domandas de adesione iscadint su 4 de trìulas de su 2013.

 

 

"Le maschere nel mondo e in... Sardegna"

Sa Biblioteca Comunale de Magumadas paris cun s'Assòtziu Culturale "Sofia", invitant a partetzipare a sa relatzione de Prof. Piergavino Vacca "Le maschere nel mondo e in... Sardegna" chi s'at a fàghere  lunis 14 de ghennàrgiu (bennalzu) a sas chimbe de sero (h 17,00) in sa Biblioteca Comunale.


Presentatzione libru

Sàbadu 15 de nadale a sas ses de sero (h 18,00) in sa Biblioteca Comunale de Magumadas in via Trieste, sa Biblioteca Comunale paris cun s'Assòtziu Culturale "Sofia", presentant su libru de Antonio Maccioni "101 tesori nascosti della Sardegna da vedere almeno una volta nella vita" (Newton Compton, 2012), cun sa presèntzia de s'autore e sos interventos musicales de Antonio Dettori e Antioco Milia. 

 

XVII Sagra de Santa Lughia

Domìniga 23 de cabudanni in Nigolosu (in sa "Piccola Casa della Divina Provvidenza") s'at a fàghere sa XVII Sagra de Santa Lughia de Magumadas. A sas deghe e mesa b'est sa Missa e a sas ùndighi e mesa s'ant a beneìghere sos produtos de sa terra, chi a pustis s'ant a pòdere mandigare. 

 

Iscola de calcio pro sos pitzinnos

Sas Amministratziones comunales de Frussio, Magumadas, Sune e Tinnura cherent fàghere un'iscola de calcio pro sos pitzinnos (òmines e fèminas) chi tenent dae sos 5 a sos 13 annos. Su cursu costat 10 èuros su mese e 10 èuros de iscritzione.
Sos mòdulos si podent agatare in ogni Comune de residèntzia e sas iscritziones cherent fatas intro de mesudie de su 25/09/2012.

 

Seletzione pùbblica

Su Comune de Magumadas faghet una seletzione pùbblica pro una graduatòria pro su "Cantiere tributi lotta all'evasione", cun assuntzione a tempus partziale (25 oras sa chida) e determinadu (massimu pro 1 annu) de 2 "Istrutores contàbiles", categoria giurìdica C - positzione econòmica C1.
Sa domanda pro partetzipare nche cheret mandada a su Comune de Magumadas intro de su 21 de austu 2012. Su collòchiu s'at a fàghere su 7 de cabudanni a sas 10,00 in s'àula cunsiliare de su Comune de Magumadas.
Leghe totu su bandu.



Avisos

1) Su Comune de Magumadas chircat 1 mastru de muru e 3 maniales. Sas domandas cherent presentadas dae su 6 a s'8 de austu a s'ufìtziu de collocamentu (CSL) de Cùglieri.

2) Su Comune de Magumadas avisat sos chi tenent domos in Magumadas e sunt interessados a las bèndere pro nde fàghere allògios de "edilìtzia residentziale pùbblica", de lu fàghere a ischire a su Comune intro de su 30 de trìulas 2012.

3) Su Comune de Magumadas avisat a sos Magumadesos  chi sunt interessados a tènnere domos populares, chi si podent preguntare in s'ufìtziu tècnicu de su Comune.

 

Est operativu in Magumadas s'Ufìtziu Limba Sarda

Est operativu finas in Magumadas s'Ufìtziu de sa Limba Sarda.
Ocannu su servìtziu est a livellu sovra-comunale (in rete cun totu sos Comunes de s'Unione de Comunes de Planàrgia e Montiferru otzidentale) e Iscanu est su Comune capofila.
Pro cale si siat informatzione s'Ufìtziu est abertu ogni mèrcuris cun oràriu 16,00-19,00.