Tresnuraghes

In "Lidolando" chie òrdinat in sardu pagat prus pagu

A faeddare in sardu cumbenit. Ca su cherbeddu si mantenet giòvanu? Emmo, ma non pro cussu ebbia. Cumbenit ca s'ispendet prus pagu.
"Comente podet èssere?" ant a nàrrere sos deghe letores de custu blog (pro parafrasare a Manzoni).
Podet èssere ca dae oe e pro unu mese in su tzilleri Lidolando de Tresnuraghes (via dei Tamerici n° 3) chie òrdinat in sardu (cale si siat sardu de cale si siat logu de Sardigna) at a tènnere un'iscontu de su 10%.
Cantu nos agradat custa idea! Duncas andade e ordinade, ca cumbenit a su bussieddu e a sa difusione de sa limba.
Pro bos informare mègius podides iscrìere in sa pàgina Facebook de s'eventu.

 

"Soggiorno termale" pro sos antzianos

Su Comune de Tresnuraghes organizat unu "soggiorno termale" pro chie tenet prus de 65 annos. At a durare 7 dies e 6 notes e s'at a fàghere in sas termas de Fordongianus in su "Sardegna Grand Hotel". Sos antzianos pagant una cuota de 200 èuros, chie tenet prus pagu de 65 annos podet partetzipare ma pagat sa cuota intrea. 

 

 

Laboratòrios creativos cun materiales de recùperu

Totus ischimus chi a sos pitzinnos non lis mancat sa fantasia e si custa benit istimulada dae sos mannos cun propostas de atividades interessantes, nde podent essire a campu cosas bellas meda. E custu est su chi ant fatu sos pitzinnos de Tresnuraghes in sos laboratòrios organizados dae su Comune e dae su Centru de educatzione ambientale (Centro! ) de "riciclaggio creativo", faghende cosas noas e bellas cun ogetos o cosas de iscartu. Giai in sos meses passados sos pitzinnos, ghiados dae sas operadoras espertas Alessandra Manca e Giovanna Manca, aiant realizadu in antis su presèpiu e a pustis sos bestires de Carrasegare, totu frutu de materiales de recùperu e de sa creatividade issoro. In custos ùrtimos meses s'est fatu un'àteru laboratòriu, paris cun s'ufìtziu de sa limba sarda, in ue su tema fiat su beranu e sos pitzinnos si sunt apentados meda a fàghere un'ortu, traballende sa terra e prantende ortalìtzia de onni genia. In prus ant fatu fiorieras de linna cun pedanas de linna de iscartu. Ant imparadu sos nùmenes de sas fases de traballu, de sos atretzos impreados, de s'ortalìtzia, totu in sardu. Sunt istados momentos importantes de sotzializatzione, educatzione ambientale e linguìstica chi, pro sos tempos de oe, no est cosa de pagu contu. 

 

 

Calendàriu de sas manifestatziones de istiu

Sa Pro Loco de Tresnuraghes paris cun s'Assòtziu isportivu U.S.D. Tresnuraghes, su coro Pitanu Morette, su Tennis Club Planàrgia, su Comitadu giovanile e s'Anspi organizat sas atividades de s'"Istiu tresnuraghesu 2015", chi s'ant a fàghere siat in sa bidda siat in sa marina.
B'at a àere ballos, giogos pro pitzinnos, manifestatziones isportivas, càntigos e garas poèticas, e su 18 de austu in Porto Alabe s'at a fàghere sa sagra de su porcheddu.
Su calendàriu de sas manifestatziones, chi sunt patrotzinadas dae su Comune, si podet iscarrigare dae inoghe.


Iscanu - Tinnura - Tresnuraghes - Teatrinos de Nadale in limba sarda in sas iscolas de s'infàntzia

Ischimus chi su prus de sos pitzinnos, a dies de oe, sunt pesados in italianu ca oramai s'est pèrdida sa "trasmissione intergeneratzionale" de sa limba sarda, e duncas est pretzisu de rimediare ca si nono dae inoghe a pagos annos sa limba sarda nch'est ispèrdida! Sa mègius cosa diat èssere de torrare a faeddare in sardu a sos pitzinnos in domo, in iscola e in totue, a manera chi l'imparent e la faeddent gasi comente faghent cun  s'italianu, s'inglesu e totu sas àteras limbas chi si cherent. In prus b'at de nàrrere chi sa chirca iscientìfica a livellu internatzionale, in particulare sos istùdios chi est faghende Antonella Sorace, professoressa de Linguìstica Acuisitzionale in s’Universidade de Edimburgo, narant chi sos pitzinnos chi connoschent prus de una limba sunt prus abbistos, imparant mègius sas àteras limbas e andant bene in iscola, a s’imbesse de su chi pensat calicunu! E custu lu naraiat finas Maria Teresa Pinna Catte, annos a como, in un’òpera de importu mannu chi s’intìtulat “Educazione Bilingue in Sardegna”. Pro tantu s'Ufìtziu de sa Limba Sarda, cun s'apògiu de sos Comunes e de sas iscolas de s'infàntzia, at fatu una sèrie de laboratòrios de limba in sas iscolas de s'infàntzia de Iscanu, Tinnura e Tresnuraghes, traballende cun unos chentu pitzinnos in totu. Sos laboratòrios sunt finidos cun su teatrinu de Nadale "Cando est nàschidu Gesùs" chi sos pitzinnos sunt presentende pròpiu in custas dies in sas iscolas.

 

 

Presèpiu cun materiales riciclados

Su Comune de Tresnuraghes at organizadu unu laboratòriu de educatzione ambientale chi tenet comente tema su riciclàgiu, pro sos pitzinnos dae sos 6 a sos 13 annos e pro sos genitores. S'iscopu fiat de fàghere cosas noas cun ogetos betzos e de imparare su rispetu pro s'ambiente. In particulare s'est fatu unu presèpiu cun materiales de riciclu, originale meda, chi in custas dies si podet ammirare in sa crèsia de Santa Rughe.

 

 

"Roba de presèpiu"

Giòbia 18 de nadale a sas deghe e mesa (h 10,30) in su tzentru de agregatzione sotziale de Tresnuraghes s'at a fàghere s'ispetàculu interativu in limba sarda, pro minores, intituladu "Roba de presèpiu", cun Antoni Dettori e Antonella Murtas. Totu sos pitzinnos sunt invitados a partetzipare! 

 

 

Rapresentatzione teatrale

Domìniga 14 de nadale 2014 a sas sete e mesa de sero (h 19,30) in su Tzentru de agregatzione sotziale de Tresnuraghes su Grupu Filo-drammàticu "Imitatio Vitae, Speculum Consuetudinis" at a fàghere s'ispetàculu teatrale "Il Fiume e la Collina", ispiradu a sas poesias de Edgard Lee Masters dae s'Antologia de Spoon River paris cun sos acordos coragiosos de Fabrizio De Andrè. Sa regia est de Antonio Naìtana, sa vitze-regia de Silvia Tanda. Orchestra e boghes "La Band di Jones il Suonatore". Seis totus invitados a partetzipare. 

 

 

"Lo zaino dell'educatore"

Su Comune de Tresnuraghes invitat a partetzipare a "Lo zaino dell'educatore", momentos de riflessione e cunfrontu pro genitores, mastros e educadores ghiados dae su dutor Lorenzo Braina, pedagogista e diretore de CREA (Tzentru pro sa Creatividade Educativa de Aristanis). S'ant a fàghere in su Tzentru de Agregatzione Sotziale de Tresnuraghes in sas dies chi sighint: giòbia 02/10/2014; 09/10/2014; 16/10/2014 a sas chimbe de sero (h 17,00).
Sas temàticas ant a èssere: "L'ancora e la vela" (orientamentu a s'interioridade e a sa vida pro pitzinnos e pitzocos); "Far durare, dare spazio" (gestione de sas crisis educativas piticas e mannas); "La scatola chiusa" (educare intre reale e possìbile).
Iscàrriga sa locandina

 

Intervista in sardu a Anthony Muroni, diretore de s'Unione Sarda

Sa rivista "Làcanas" at publicadu un'intervista fata dae Pàulu Pillonca a Anthony Muroni, diretore de s'Unione Sarda. La publicamus nois puru, intantu ca est fata totu in sardu, e a pustis ca nos paret chi b'apat cosas de importu in contu de limba sarda e de informatzione giornalìstica.
Anthony Muroni est diretore de s'Unione Sarda dae su 2013. Nàschidu in Austràlia e crèschidu in Tresnuraghes, at imparadu su sardu chistionende cun sos giajos e gioghende in carrera cun sos àteros pitzinnos.
A Pillonca chi li preguntat ite nde pensat de custa limba, li rispondet chi "a ischire su sardu est un'agiudu" e chi in su traballu de unu giornalista est una 'marcia in prus' ca "faeddende in sardu est prus difìtzile a nàrrere fàulas".
Comente diretore de su cuotidianu prus antigu de Sardigna, Muroni ispiegat chi su disìgiu suo est de nde fàghere "unu giornale chi apat su pesu ('che riesca a incidere') in totu sos setores". Unu giornale "chi ispieghet bene sas cosas e nàrgiat semper sa veridade, ca si sa gente pensat chi nois semus còmplices de sa polìtica nois semus mortos. Su nostru devet èssere su giornale de sa gente".
Cando faeddat de sa situatzione sarda atuale, Muroni no la mandat a nàrrere: "Sa Sardigna si non nde pesat pagu-pagu sa conca est morta. E finas a como no nde l'at pesada mai. Nos amus bèndidu sa terra pensende de balangiare meda, ma s'indùstria cheriat su soddu fàtzile e como non si podet fàghere prus nudda. Nois no imparamus mai".
At a èssere benende su tempus chi sa classe intelletuale comintzat a faeddare a boghe crara, sena tìmere sos meres? Chi comintzat a beru a nàrrere sas resones de sa gente comune, de sos chi boghe non nde tenent? Isperamus...

 

Manifestatziones pro s'istiu 2014

Su Comune de Tresnuraghes invitat a partetzipare a sas manifestatziones de istiu, chi s'ant a fàghere siat in Tresnuraghes siat in Porto Alabe. Abaidade sa locandina cun su programma cumpletu e bonas fèrias a totus!
Iscàrriga sa locandina 

 

 

Animatzione in limba sarda

Su Comune de Tresnuraghes, paris cun sa Biblioteca e cun s'Ufìtziu de sa Limba Sarda, invitant a partetzipare a s'animatzione in Limba Sarda cun "Antoneddu Conchi Canu". S'ant a fàghere duos seros de animatzione, ghiada dae Antoni Dettori de Iscanu (animadore pràticu meda). Ant a partetzipare sos pitzinnos de edades diversas, in sas dies chi sighint:
- Martis 22 de triulas 2014, dae sas sete e mesa a sas oto e mesa de sero (h 19,30-20,30) pro sos pitzinnos prus piticos (dae sos 5 a sos 10 annos);
- Mèrcuris 6 de austu 2014, dae sas sete e mesa a sas oto e mesa de sero (h 19,30-20,30) pro sos pitzinnos prus mannos (dae sos 11 a sos 14 annos).
Sas atividades s'ant a fàghere in sa Biblioteca Comunale. 
Benide in medas, minores e mannos, bos isetamus!

 

Progetos educativos pro pitzinnos

S'Amministratzione Comunale de Tresnuraghes faghet a ischire chi cheret organizare unu  progetu "ludico-educativu" pro s'istiu, chi si narat "SCARPE GIALLE E SCARPE ROSSE" pro pitzinnos dae sos 5 a sos 13 annos. Sas atividades laboratoriales e de animatzione s'ant a fàghere in sa Biblioteca e in logos abertos. Su progetu at a finire cun duas notes biancas cun sa partetzipatzione de minores e mannos. Chie cheret partetzipare devet fàghere sa domanda a su Comune intro de su 01/07/2014. Pro informatziones si podet domandare a s'Ufìtziu de sos Servìtzios Sotziales (tel. 0785-314022). Sa modulìstica s'agatat finas in su situ de su Comune (www.comune.tresnuraghes.or.it).

 

Cunvegnu de archeologia

Sàbadu 14 de làmpadas 2014 in Tresnuraghes (Tzentru de agregatzione sotziale) s'at a fàghere su cunvegnu "Punto Linea Superficie. I territori del confronto", chi at a tratare sos temas de s'archeologia preventiva, de sa pianificatzione de su territòriu e de sa tutela de su patrimòniu culturale, cun un'abbaidada particulare a sas prospetivas urbanas e territoriales pro su comune de Tresnuraghes.
Su cunvegnu incomintzat a sas 9 e mesa (h 9,30) e at a durare totu die.
Leghe su programma 

 

Servìtziu "Spiaggia Day 2014"

S'Ufìtziu Servìtzios Sotziales de su Comune de Tresnuraghes informat chi sunt abertas sas iscritziones pro su servìtziu "Spiaggia Day 2014", gestidu dae sa Cooperativa Sotziale "Progetto H" de Macumere. Su servìtziu est destinadu a sos pitzinnos intre sos 6 e sos 14 annos. S'at a fàghere in Bosa Marina, dae sas noe a sas ses de sero (h 09,00-18,00) pro 12 dies. Si pagat € 90,00 (b'est contadu totu). Sas domandas de partetzipatzione si devent presentare a s'Ufìtziu Protocollo intro de su 30.06.2014. Sos mòdulos de domanda si podent agatare in s'Ufìtziu Servìtzios Sotziales o in su situ istitutzionale de su Comune de Tresnuraghes (www.comune.tresnuraghes.or.it). 

 

 

Cunferèntzia "Educare alle regole e alla libertà"

S'Assessoradu a sos Servìtzios Sotziales e Culturales de su Comune de Tresnuraghes organizat sa cunferèntzia-dibàtidu "Educare alle regole e alla libertà" chi s'at a fàghere lunis 9 de làmpadas a sas chimbe de sero (h 17,00) in su Tzentru Sotziale in Pratza Giovanni XXIII. S'incontru at a èssere ghiadu dae su Dut. Lorenzo Braina, Pedagogista e Diretore de su tzentru pro sa creatividade educativa de Aristanis. Est abertu a chie totu tenet una responsabilidade educativa (genitores, mastros, animadores isportivos e religiosos). 

 

Tzia Frantzisca Maria Sulas festat sos 101 annos

Su 24 de maju tzia Frantzisca Maria Sulas at cumpridu 101 annos. A custa bella edade est ancora ativa, si tenet contu sa domo e, "udite, udite!", cosit su filet sena ochiales! Li faghimus sos augùrios prus mannos a medas annos ancora cun salude! 

 

 

Rassigna de poesias de Augusto Piras e Gigi Piu

Mèrcuris 30 de abrile 2014 a sas chimbe e mesa de sero (h 17,30) in sa biblioteca de Tresnuraghes s'at a fàghere una rassigna de poesias lèghidas e cummentadas dae sos autores Augusto Piras e Gigi Piu. Custu est su primu "eventu" de su sòtziu culturale intercomunale nou "Planàrgia". S'at a presentare finas su seminàriu de poesia sarda chi s'at a fàghere in sa biblioteca de Frussio s'8 de maju 2014 a sas chimbe de sero (h 17,00). Su seminàriu at a tratare de custos argumentos: istòria de sa poesia sarda dae sas orìgines a dies de oe; poesia, mùsica, cantzone; poesia a bolu, de meledu e a versu isortu; modellos de poesia rimada (su sonetu, s'otada, sa tertzina, etz.). Sos interessados si podent iscrìere in sas bibliotecas de Tresnuraghes, Magumadas, Frussio, Iscanu e Sinnarìolo. 

 

 

Presèpiu vivente

Su Cumitadu zonale Alghero-Bosa e sos Tzìrculos ANSPI de Frussio, Tresnuraghes, Macumere e Bonorva, cun su contributu de sos Comunes de Frussio e de Tresnuraghes, organizant su Presèpiu vivente chi s'at a fàghere in sas carreras de su tzentru istòricu. In Tresnuraghes s'at a fàghere su 28/12/2013 a sas chimbe e mesa de sero (h 17,30) e in Frussio su 04/01/2014 semper a sas chimbe e mesa de sero. 

 

 

Istiu tresnuraghesu

Su Comune de Tresnuraghes faghet ischire chi domìniga 14 de trìulas s'at a fàghere un'escursione a su "Parco Acquatico Aquafantasy - Isola Rossa". Chie cheret partetzipare devet dare s'adesione a s'Ufìtziu Protocollo de su Comune intro de su 09/07/2013 (iscàrriga sa locandina).
Dae s'11 de trìulas incomintzant finas sas manifestatziones de istiu in Tresnuraghes e in Porto Alabe.
Pro nd'ischire de prus  iscàrriga sa locandina e su programma.

 

Laboratòriu pro sos pitzinnos

Su Comune de Tresnuraghes organizat unu laboratòriu pro sos pitzinnos dae sos 4 a sos 14 annos. Si narat "Coloriamo la biblioteca " e s'at a fàghere onni martis de su mese de trìulas dae sas bator a sas ses de sero (h 16,00-18,00) in sa biblioteca noa in carrera San Giorgio. S'oràriu de istiu de sa biblioteca est su chi sighit: su LUNIS dae sas oto a sas duas (8,00-14,00) e a su sero dae sas tres e mesa a sas sete e mesa (15,30-19,30); su MARTIS dae sas tres e mesa a sas sete e mesa (15,30-19,30); sa CHENÀBURA dae sas ses de sero a sas deghe de note (18,00-22,00).   

 

 

Atividades de istiu pro sos pitzinnos

Su Comune de Tresnuraghes organizat atividades pro sos pitzinnos dae sos 4 a sos 14 annos. S'ant a fàghere giogos in piscina (in "Abba Mala Village") tres oras sa die pro 12 dies.
Su Comune organizat finas sa colònia diurna (semper in "Abba Mala Village") pro 12 dies dae sas 9 a sas 6 de sero.
Pro nd'ischire de prus si podet iscarrigare s'avisu o preguntare in su Comune de Tresnuraghes.



Presentatzione libru

Su Comune de Tresnuraghes, paris cun Biblioteca di Sardegna, invitant a sa presentatzione de su libru "In Tresnuraghes" a cura de Antonella Unali, chi s'at a fàghere sàbadu 15 de nadale a sas ses de sero (h 18,00) in su Tzentru de Agregatzione Sotziale de Tresnuraghes. B'at a èssere fintzas s'inauguratzione de sa mustra fotogràfica "In Tresnuraghes".

 

 

"Soggiorno termale" pro sos antzianos

S'Amministratzione comunale de Tresnuraghes at organizadu unu "soggiorno termale" pro chie tenet prus de 65 annos. Durat 7 dies e 6 notes e s'at a fàghere dae su 25 de santandria a sa prima die de su mese de nadale in sas termas de Fordongianus. Pro partetzipare si pagat  € 160,00. Sas domandas si devent presentare in Comune dae s'8 a su 30 de santugaine 2012. 

 

Torneo de murra

Su 22 de cabudanni in "Piazza Stazione" in Tresnuraghes s'at a fàghere su Primu Torneo de Murra.
Sa gara cumintzat a sas 9 de sero e sas iscritziones sunt abertas finas a sas 8 e mesa. Pro partetzipare si pagat trinta èuros a còpia. A sas deghe e mesa chena pro totus sos partetzipantes. 

   

 

Die de agregatzione in su Sinis

S'Amministratzione Comunale at programmadu una die de agregatzione sotziale pro chie tenet prus de 65 annos, chi s'at a fàghere in custu mese in sa Penìsula de su Sinis.
Si màndigat in ristorante e pro partetzipare si pagat 10 èuros.
Chie bi cheret andare devet presentare sa domanda in Comune dae s'1 a su 15 de cabudanni.


Don Paolino Fancello torrat a Bosa

Don Paolino Fancello, pàrracu de Tresnuraghes dae 25 annos, torrat a Bosa comente pàrracu de sa parròchia de su "Sacru Coro", inue fiat istadu annos como e inue aiat fundadu sa Polisportiva Calmèdia e Radio Planàrgia.

 

Sero de mùsica cun sos pitzinnos

Su 30 de austu a sas 9 de sero in pratza "Giovanni XIII" s'at a fàghere unu sero de mùsica cun sos pitzinnos organizadu dae sa Parròchia "Santu Giolzi" paris cun s'Amministratzione Comunale.
Partètzipat Angela Farina e presentat Maria Giovanna Cherchi.


Manifestatziones

- Su Comune e sa Pro Loco de Tresnuraghes invitant a partetzipare a "S'arzola cun sos boes" chi s'at a fàghere su 5 de austu a sas 5 de sero in Tresnuraghes. Bi podides agatare finas sos produtos locales.

- Su Comune e s'ANSPI de Tresnuraghes organizant unu laboratòriu pro fàghere istrumentos musicales cun cosas de "recùperu". Si narat "Riciclando" e est pro sos pitzinnos dae sos 4 a sos 13 annos. S'at a fàghere dae su 6 a s'8 de austu dae sas 9 a mesudie in Carrera Munitzìpiu. Su 9, a sas 7 e mesa de sero, sa banda "Riciclando" at a sonare intro de bidda.

 

Tresnuraghes - Ballos in carrera

Su Comune de Tresnuraghes, paris cun s'ANSPI, organizat in Porto Alabe sos "Ballos in carrera cun Otello".
Est a atopare a Pratza de sos Tzinìberos ("Piazza dei Ginepri") a sas deghe de sero pro ballare ballu "liscio" e latinu-americanu.
Sas datas sunt sas chi sighint:
Pro su mese de trìulas su 20 e su 28
Pro su mese de austu su 3, su 10, su 17 e su 24.


S'Ufìtziu de sa Limba Sarda est torra operativu

Est torra operativu in Tresnuraghes s'Ufìtziu de sa Limba Sarda.
Ocannu su servìtziu est a livellu sovra-comunale (in rete cun totu sos Comunes de s'Unione de Comunes de Planàrgia e Montiferru otzidentale) e Iscanu est su Comune capofila.
Pro cale si siat informatzione s'Ufìtziu est abertu ogni mèrcuris cun oràriu 10,00-14,00.